sudan rap
أهلا بـــــــــــــــكم في منتديات راب الســـــــودان

انضم إلى المنتدى ، فالأمر سريع وسهل

sudan rap
أهلا بـــــــــــــــكم في منتديات راب الســـــــودان
sudan rap
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

~*~ راب الســـــودان ~*~


أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى

كيف تكتب فري ستايل ? ? ? ? تعال وبقلك كيف ؟؟

3 مشترك

اذهب الى الأسفل  رسالة [صفحة 1 من اصل 1]

MR-CASH

MR-CASH
.:. مشــــرف .:.
.:. مشــــرف .:.

سلام عليــــــــــــكم


1- أول واهم شي : فوجهه نظري المتواضعة ، فن الراب او الفري ستايل بدأ فـ نيويورك فامريكا وكان الهدف منو انو شباب المناطق اللي بدأوه يطلعو افكارهم و اراؤهم بطريقة جمل موزونة وماشية على ايقاع معيين يشد الشخص اللي بيسمعها
أكبر غلط احنا ممكن نغلطو اننا لما نكتب فري ستايل يعبر عن افكارهم و اراؤهم مرة تانية ، وكده تكون كل المقولات عن التقليد الاعمى تنطبق علينا 100 % حتى ولو كنا بنكتب بأفصح عربية فصحى ، وكاننا شعب شبابو امخاخهم فاضية ومستيين يشوفو اي شي عشان يحشيها ، اخلاقنا وعاداتنا وقيمنا لازم ما نتخلى عنها حتى واحنا بنكتب راب ، ولازم يكون رابنا تعبير عننا وصولينا لينا احنا مو لهم هما



2- الفري ستايل :


أ - عشان تكتب فري ستايل أولا وكـ أي حاجه تانية بتكتبها سواءا قصيدة او خاطرة لازم تجمع افكارك وتكون فكرة أساسية للموضوع اللي راح تتكلم عنو ، وحتى وان خرجت بعض الـ " لاينات " عن الفكرة الاساسية لازم يكون للفري ستايل طابع واحد كـ كل سواءا كان حزين أو قتالي أو ساخر " فكاهي " أو حتى عاطفي ، حاول دايما يكون ليك شخصيتك المميزة فكتاباتك وقد ما تقدر ابعد عن التقليد ، أبدا مهو صعب انك تكتب كلام " موزون " وممكن اي واحد في المتوسط يكتبلك الف سطر ازا كانت المشكلة الوحيده هيا الوزن ، طريقة طرحك للكلام اللي فبالك مهمــة جدا ، حاول ما تعيد نفس المعنى فاكتر من سطر ، اختصر قد ما تقدر مع كتابة اكبر عدد من المعاني ، وحاول تضيف نوع من العمق لكتاباتك ، يعني لا تخلي كل الكلام اللي تكتبو سطحي ، استخدم الاستعارات والتورية والتشبيه وكل مهارات اللغة اللي تقدر تستخدمها ، حاول تخلي اللي بيقرا يتستفز كل تفكيرو عشان يتتبع الكلام اللي بتكتبو ، انتا ما بتكتب موضوع فغرفة الجلسة ولازم تخليه واضح ، وصل فكرتك للي بيقرا بدون ما تعطيلو هيا بنفسك ، يعني حطلو اللقمة عالصحن بس لا تأكلو هيا ، فهمتو حاجه ؟


عشان تفهمو روحو شوفو الفرق بين كتير من الفري ستايلات في القسم هنا وبين الفري ستايل اللي نزلو رز بلبن


ب_ الوزن_ نقصد بيها القافية _
طبعا الوزن يعتبر الركيزة الاساسية للـ فري ستايل اللي بتكتبو ، ممكن تكتب كلام معقد وكلو حكم بس غير موزون ، كلامك هادا اكتبو فورقة وحطو عندك في الدرج مع الاسف ما نعتبرو فري ستايل ،
الوزن طبعا درجات في اوزان قوية وفي اوزان ضعيفة ، في اوزان تقيلة وفي اوزان خفيفة
بالانجليزي المسألة دي طويلة وفيها تفصيلات كتير ( الوزن الكامل والجزئي و و و ) بس انا ما اعرفها زي الناس وما عندي استعداد اتفلسف بصراحه
بس خليني اتكلم عاللي شفتو بالعربي طالما احنا مهتمين بيه اكتر هنا


وقبل ما اتكلم على قوة الوزن وتقلو اول حاجه لازم اكلمك الـ سطر أو ال Line


مثال عشان اشرحلكم عليــه :




سطرين من غير عنوان .... طول الفترة دي بتقول كلام في الهوا ....


أستحي و أتعلم .... لو القدر على شمعة كان الأكل فوسطو أستوا ... - جار القمر



السطرين هدول كلهم بلغة الـ راب نسميهم سطر أو " لاين " ( بين قوسين جار القمر هنا بيتكلم بالـ عمق اللي كنت باكلمكم عنو في الاول )



اللاين زي ما انتو شايفين يتكون من سطرين نهايت كل واحد فيهم تكون راكبة عالتاني
قووة الوزن تعتمد على طوول النهاية الراكبة ، عند جار القمر هنا بس حرفين واللي انا ملونهم ، عاد هنا انتا وشطارتك وانتا وتمكنك من اللغة والحرف تقدر توزن حرفين تلاته اربعه ، ممكن تخلي اخر كلمتين او تلاته موزونة ، وممكن تخلي كلمات فوسط السطر راكبة مع الوزن حق نهاية السطر او الـ " قفلة " وهادا طبعا يعطي السطر قوة اكبر او حتى تخلي كلمتين فوسط السطر موزونة مع بعضها بس وزنها يختلف عن وزن القفلة ، كل دي حاجات تقوي الفري ستايل حقك ، مثلا :



شي عجيب من دج لنكن سارت بعد قصة الا ميـــر شديدة



اش رايك تطلعي مـن هنا وانا اجبلك علبة منا كيــــر جديدة - باد



أهم غلطة لا تغلطها هنا، لا تخلي الحروف تغرك ، زي ما انتو عارفين لغتنا الحبيبة فيها حركات فتحة وضمة وكسرة ، لا تكتب كلمة اخر تلاته حروف كلها زي بعض بس تختلف في التشكيل ، قبل ما تحكم على انو الكلمتين الفلانية موزونة بالشكل جرب انقطها وشوف هل حتتنطق بنفس الطريقة ولا لا ، مثلا : كلمة " مـَـسـْـجـِـدْ ، ابدا مهي موزونة مع كلمة سـَـجَــدْ رغم انو الاتنين نهايتهم جيم ودال ، وكلمة أحـْـقـِـدْ موزونة مع مسجد رغم انو نهايتها قاف ودال ، المهم عندنا هوا النطق مو شكل الكلمة او الحروف اللي فيها



جـ - الـ " ايقاع " او الـ Flow
وهادا اللي يفرق الفري ستايل عن الشعر بالدرجه الاولى
شفتو اكيد شاعر وهوا بيلقي قصيدة ، دايما تلقوه يوقف ، يقول شطر ويوقف ، وبعدين كلمتين ويوقف ، ويعيد الشطر الاول معاه الكلمتين ، بعدين يزيد عليها شطر
الكلام دا ما ينفع عندنا ، كتابتك لازم يكون فيها نوع من الاستمراية ، يعني تكتب الكلام بحيث انك تقدر تقولو ورا بعض وبسرعه وما توقف غير عشان تاخد نفسك ، وهادي اكبر مشكلة فرايي للي بيكتبو عندنا هنا ، كتير بيكتبو كلام موزون لاكن بدون أي إيقاع ، بتسمعو اكيد اغاني راب وشايفين كيف بيغنوها ، اسمعو أغنية رز بلبن وشوفو كيف كاتب الكلمات ..



خد نفس كده وجرب اقرا الكلام بسرعه حتقولو كلو مرة وحده من غير ما توقف وحتحس المعنى متكمل ما يحتاج تفصل بين سطر والتاني عشان اللي بيسمعك يفهم ايش بتقول
في المقابل شوفو لزيز
اخ .. يا حيوان .. عاملي انك انسان وتجي تبربر .. روح لدكتور الاسنان . واسأله هل انا انسان .. حيقولك للأسف لا .. تقوله حيوان يقولك للأسف لا .. تقوله طب ايش .. يقول تكروني وبتدق الطيران..


وه يا دكتور دا مو انسان .. يقولك لا للأسف دا هجين يسموه إنسان



ملاحظين الفرق ؟؟


حاولو دايما تكتبو زي ما رز مسوي ، قبل ما تعتمد الفري ارجع اقراه كلو مرة وحده شوف تقدر تقراه بطريقة متسلسلة ولا لا ، السطر الي تحس فيه " تكة " حاول انك تغييرو ، شيل كلمة وحط كلمة تانية مكانها ، قول السطر بطريقة تانية ، بدل ولف ودور فكلامك الين ما توصل للشي اللي يرضيك انتا شخصيا ، اهم حاجه انو يكون كلامك عاجبك انتا عالاقل ، الفري ستايل زيو زي اي موهبه تانية خلونا نقول الكورة مثلا ، رونالدينو عندو موهبه ربنا اعطالو هيا ، بس تتوقعو لو انو من يوم ما اتولد ما عمرو مسك كورة ولا لعب وجبناه وعمرو عشرين سنه قلنالو ورينا حيعرف يسوي شي ؟ اكيد لا
نفس الشي هنا ، جرب واكتب واكتب ومع الوقت اكيد حتتحسن ، اهم حاجه حاول تتعلم من اخطاءك ولا توصل لمرحله تعجب فيها بنفسك وتحس انو ماهو محتجلك تطوير ، اقرا للناس اللي احسن منك واقرا لنفسك وشوف ايش الفرق بينك وبينهم واقعد قارن ، ومصيرك تتحسن
تعبت بصراحه ولو انو في حاجات كمان ، بس تقريبا هادي اهم الاشياء وبكل بساطة ، لو ربنا اراد اكلمكم مرة تانية عالباتلز او " المنافسات " الكلامية زي اللي بين لزيز ونعناع حاليا ، اقلكم على شوية مهارات فيها وحاجات ممكن تساعدكم بس صراحه ما اقدر اوعدكم بحاجة
في حاجه هنا مهمة لازم اقولها ، ازا كان الكلام اللي انتا بتكتبو ضعيف كونو موزون انو مكتوب بطريقة فري ستايل محا يخليه قوي او حلو ، يعني : ازا انتا في الحقيقه ما تعرف تحش ، الحش حقك بالفري ستايل محا يطلع حلو ، ازا انتا دمك تقيل ، لو جيت تنكت بفري ستايل حيطلع دمو تقيل ، اتخيل الحاجة اللي انتا كتبتها مهي موزونة او مهي فري ستايل وكانها كلام عاادي واقراها ، شوف الكلام اللي كاتبو انتا حلو لا لا ؟ اللي يقراه حيعجبو لو ما كان فري ستايل ولا لا ، بتقول حاجه ولا بس بتحشي كلمات مالها معنى ، قبل ما توزن كلامك شوف قوتو كـ كلام عادي وكـ افكار انتا بتعبر عنها ، في ملاييين الملاييين من الناس اللي يكتبو فري ستايل وراب في الدنيا ، ايش اللي اعطا الشهرة لناس معينيين دونا عن ناس ، حتقولولي الالحان ، حاقلكم شوفو jay z ، الحانو مقارنة بناس تانيين مرة عادية او بايخه حتى ، بس عندو شهرة غيـــــــــــر طبيعيه فامريكا ، رغم انو الاوزان حقتو ماهي داكا الشي الجباار ، مهو زي امينم ولا حتى يتقارن بيه ، بس الكلام اللي بيقولو فسوق الكلام قيمتو كبيرة ، ان شاء الله تكون فكرتي وصلت
في النهاية ارجع واعيد انا مني خبيـر انا مجرد واحد معجب بدا الفن وقريت عنو كتير وان شاء الله تكون الحاجات اللي قلتلكم هيا صح وتكون فادتكم، في المنتدى عندنا فلاوي وعندنا الاستاز رز بلبن اتمنى يقرو الموضوع ولو فيه حاجات غلط يا ريت يعدلولي هيا ، واي واحد فيكم يعرف اني قلت حاجه كنت غلطان فيها حاكون سعيد بانو يصححلي ، وان شاء الله اللي ما كان يعرف شي من اللي قلتو يستفيد
منقووووووول

MC HAMMER


عضـــوٍ جــديـد
عضـــوٍ جــديـد

مشكوووووور على الموضوع ولا اقول الدرس ماعارف يعطيك العافية ان شاء الله يستفيدوا الناس منوا

مدثر جـــــو


عضـــوٍ جــديـد
عضـــوٍ جــديـد

مشكوووووووووووووووووور ع الدرس

الرجوع الى أعلى الصفحة  رسالة [صفحة 1 من اصل 1]

صلاحيات هذا المنتدى:
لاتستطيع الرد على المواضيع في هذا المنتدى